ВЕРБАС – У будинку Општини Вербас вчера отримана и схадзка о пестованю руского язика у Предшколскей установи (ПУ) „Бошко Буха” Вербас, як и о виучованю мадярского язика у тей установи и заключене же за тото єст добрей дзеки при шицких заинтересованих – у локалней самоуправи, националних совитох (НС) двох меншинох и у ПУ.
Кед слово о руским язику, намаганє же би ше ознова запровадзело пестованє язика на предшколским уровню, односно формовало ґрупу дзецох хтора би раз тижньово, пополаднями, мала пестованє язика у обєкту ПУ у Старим Вербаше.
Як визначела директорка ПУ Милияна Ґруїч, од 30. марца по 15. април на уровню Установи будзе конкурс за упис дзецох, дзе будзе и надпомнуце родичом же маю право уписац дзецко на язику националней заєднїци, односно о тим ше вияшнїц у анкети. После спознаня о заинтересованосци родичох же би їх дзецко ходзело на пестованє мацеринского язика, буду формовани таки ґрупи.
На схадзки тиж заключене же шицки боки на свой способ помогню най информациї о спомнутей анкети дойду до родичох котри буду уписовац, лєбо уж маю уписани дзеци до Предшколскей установи.
Предсидателька Одбору за образованє НС Руснацох Мелания Римар на схадзки визначела же указана добра дзека, розуменє и же ше наздава же з того виду и конкретни резултати, односно же знова зажиє ґрупа за пестованє руского язика, як окремна активносц у пополадньових годзинох. Вона додала же у тим шицки маю свою улогу – поволовац, надпоминац и буц у тим витирвали.
Попри Римаровей, спред НС Руснацох на схадзки були и предсидатель Вивершного одбору НС Желько Ковач и членїца Одбору за образованє НС Весна Раґай Цап, як и членїца Одбору за информованє нашого НС Еуфемия Ґшвенґ. На схадзки присуствовали и предсидатель КПД „Карпати” Вербас др Деян Загорянски, як и представителє мадярскей националней заєднїци Янош Доґнар и Ливия Боґанч Андрияшевич.
Домашнїх представяли предсидателька Скупштини општини Вербас Маряна Мараш, началнїца Оддзелєня за дружтвени дїялносци Мира Недич, помоцнїца предсидателя Општини задлужена за образованє и воспитанє Ксения Бенце и директорка ПУ Милияна Ґруїч.