РУСКИ КЕРЕСТУР – Штварток, 31. януара у Ресторану ,,Червена ружа” отримана порядна Рочна скупштина Здруженя паприґарох на котрей присуствовали коло 100 особи, а спред Месней заєднїци (МЗ) Руски Керестур бул предсидатель Совиту Владимир Олеяр.
Предсидателька Здруженя Душица Орос представела финансийни звит и назначела у котрих проєктох и манифестацийох участвовало тото Здруженє. Першираз отримана манифестация у рамикох ИПА Интереґ прейґгранїчного проєкту вєдно зоз манифестацию „Днї традициї” у Кули, и Фестивалом паприґи у Калочи у Мадярскей. Як визначела Оросова, прешлорочна манифестация була сиґурно найуспишнєйша од кеди ше ю отримує, а тогорочна будзе отримана 17. авґуста.
О административних обовязкох з котрима ше стретаю паприґаре, односно реґистровани польопривредни ґаздовства (ПҐ), бешедовал член Управного одбору Здруженя Владимир Варґа. Обнову реґистрованя ПҐ потребне зробиц од 1. марца по 30. април, а по 31. май мож направиц пременки у шатвовей структури. Же би парцела котра першираз заведзена у ПҐ виторйовала условия за субвенциї, нєобходне то зробиц по 31. септембер.
Цо ше дотика Закону о сезонских роботнїкох котри ступел на моц 8. януара того року, як потолковал Варґа, єст досц нєясносци. Трошки по єдному приявеному роботнїкови би мали виношиц 300 динари дньово, без огляду на число годзинох анґажованя котре може буц найвецей 12 годзини.
Питанє кельо и як то зажиє, и чи будзе розробени механїзем контроли, бо за потупенє предвидзени кари од 5 000 до 100 000 динари, а попри тим шицка родзина (блїзша и дальша), сушедово и кажде хто пришол помогнуц, нє муша буц приявени.
