КОЦУР – У Основней школи „Братство єдинство” у Коцуре вчера отримана програма 10. манифестациї „Поетски нїтки Меланиї Павлович”, хтору орґанизовало Дружтво за руски язик, литературу и културу (Дружтво), у сотруднїцтве з коцурску Школу.
Програма була у форми явней годзини, а участвовали школяре штвартей класи руского оддзелєня, котрих учи учителька Лидия Будински, як и двойо школяре котри руски язик виучую як виборни предмет з учительку Єлену Русковски. Попри учителькох и директорки Школи Славици Байор, на програми присуствовали и проф. др Юлиян Рамач и Ирина Папуґа спред Дружтва за руски язик, литературу и културу.
Школяре ше здогадли на Меланию Павлович читаюци єй биоґрафию, а на програми виведзени и рецитациї и драмска сличка. При концу дзеци нарисовали свойо упечатки з того збуваня, а матерял за рисованє достали од Подобовей колониї „Стретнуце у Боднарова” (у орґанизациї Дружтва, у Ґосподїнцох), та з тим, символично участвовали на Колониї. З малюнкох на явней годзини направена вистава.
Папуґова и Рамач каждому школярови-учашнїкови уручели припознанє и кнїжку Дружтва на дарунок, а пригодни дарунки од Дружтва достала и Школа.
Нєшка на 12 годзин програма „Поетских нїткох Меланиї Павлович” будзе отримана у ОШ „Жарко Зренянин” у Ґосподїнцох.
