РУСКИ КЕРЕСТУР – Руски народни театер (РНТ) „Петро Ризнич Дядя” вчера обявел Звит Конкурсней комисиї за оценьованє текстох з Конкурсу за нови драмски тексти по руски, хтори вєдно розписали РНТ, Завод за културу войводянских Руснацох и НВУ „Руске слово”. Конкурс бул отворени од 1. октобра 2013. по 31. януар 2015. року, а сцигли вєдно пейц драмски тексти.
Комисия, без спознаня хто им авторе, препатрела шицки тексти хтори сцигли на Конкурс и 24. мая одлучела же ше першу награду додзелює авторови тексту „Белава принцеза”, под шифру „Аксис Мунди”, автора Сашу Палєнкаша.
Другу награду ше додзелює авторови тексту „Руснаци”, под шифру „Страйкер”, автора Себастияна Нярадия.
Трецу награду ше додзелює авторови тексту „Зочованя”, под шифру „Боунароти”, авторки Любици Кнежевич.
Шицки спомнути наградзени з Руского Керестура, а интересантне же то авторе младшей ґенерациї.
Комисия робела у составе – Микола М. Цап, историчар литератури, редактор часопису „Шветлосц”, у мено НВУ „Руске слово”, Владимир Надь, режисер, у мено Заводу за културу войводянских Руснацох и Ирина Гарди Ковачевич, литературни критичар, писатель и новинар, у мено РНТ „Петро Ризнич Дядя”.
Наградзени авторе достаню пенєжни награди, тексти буду обявени у часопису „Шветлосц”, а РНТ ма обовязку наградзени тексти у доглядним чаше поставиц на сцену.