НОВИ САД – Вчера отримана схадзка Покраїнскей влади на хторей найвецей бешедоване о финансийох, та принєшени Правилнїк о способе реализованя програмох и проєктох у 2015. року, а хтори уж започати з пенєжу Фонду за капитални укладаня АП Войводини.
Роби ше о 36 проєктох, за хтори ше видвої вєдно 881,23 милиони динари. Даєдни з тих проєктох то построєнє за препробок води у Индїї, роботни инкубатор у Сенти, обиходнїца при Ади, медицинска опрема за шпиталї у Зренянину и Кикинди, предлуженє адаптациї будинку Народного театру у Суботици и други, наводзи ше у сообщеню зоз схадзки.
З Покраїнского фонду за розвой польопривреди за кредити предвидзени 593 милиони динари, а у Фонду за помоц вибеженцом, вигнатим и розселєним особом плановани 55 милиони динари.
Покраїнска влада вчера дала согласносц за програми роботи и финансийни плани покраїнских институцийох, та културних установох. Покраїнскому секретарияту за културу одобрене звекшанє за 2,56 милиони динари, хтори наменєни за Сербски народни театер у Новим Садзе.
Понеже дотерашнї директор Заводу за културу войводянских Мадярох Єне Хайнл постал предсидатель Националного совиту Мадярох, на предкладанє Управного одбору, а з потримовку спомнутого Националного совиту, за окончовательку длужносци Заводу за културу войводянских Мадярох Покраїнска влада меновала Мартину Ґонди.