НОВИ САД – Дирекция за робни резерви Войводини у 2015. року помоц загроженим послала у вредносци од 28 милиони динари, пише у рочним звиту о дїлованю тей институциї, а хтори прилапени на вчерайшей схадзки Покраїнскей влади.
Поживово продукти и средства за гиґиєну Дирекция посилала до Епархиї Рашско-призренскей, манастиру Ґрачаница, та до народних кухньох на Косове и Метохиї. Помоц достали и загрожени з Месней заєднїци Ямена, потим ґеронтолоґийни центри у Суботици и Зомборе, Червени криж Жабель, Дом за дзеци и младих „Вера Павлович” у Билей Церкви и Центер за социялну роботу у Новим Кнежевцу.
На вимогу Канцелариї за инклузию Ромох, поживово продукти послати до здруженьох ромох у Войводини, а Нєзависни синдикат „Аґрожив” Житиште и Рада союзу синдикатох Општини Вербас тиж достали помоц з Дирекциї за робни резерви.
По конєц 2015. року, як помоц велькому чису вибеженцох, до Червеного крижу у Канїжи и Суботици сцигла роба вредносци коло пейц милиони динари. Окрем уж спомнутих, Дирекция помагала и другим орґанизацийом Червеного крижу – у Бачкей Паланки, Кули, Тителю и Сримских Карловцох.
На вчерайшей схадзки прилапена и информация о помоци Червеному крижу Войводини и здруженьом гражданох, вредносци 4,1 милион динари, з чого найвекша часц поживи пойдзе до народних кухньох у Бачкей Тополї.