НОВИ САД – З обявйованьом штирох явних оглашкох, позавчером, 3. марца, почала кампаня Покраїнскей влади у обласци обезпечованя роботи, у рамикох хторей буду анґажовани вецей як 3 000 нєзаняти особи.
Активна политика обезпечованя роботи Автономней покраїни Войводини (АПВ) за тот рок предвидзує шлїдуюци програми и мири за обезпечованє роботи: самообезпечованє роботи, анґажованє нєзанятих особох, програму фаховей пракси и явни роботи.
Субвенция за самообезпечованє роботи особом котри на евиденциї Националней служби за обезпечованє роботи (НЗС) на териториї АПВ будзе 160 000 динари, а явна оглашка тирва покля будзе средства за тоту намену.
Роботодавателє котри анґажую нєзаняти особи з евиденциї НЗС можу достац 140 000 динари за кажду особу котру анґажую, а оглашка тиж тирва покля єст средства.
Явна оглашка за реализацию програми фаховей пракси ше одноши на финансованє першого фахового оспособйованя особох з НЗС, за занїманя за хтори ше школовали. Вимоги за тоту явну оглашку, найпознєйше по 18. марец, можу придац приватни поднїмателє и привредни дружтва, як и явни подприємства и явни комунални подприємства.
Средства за финансованє явних роботох на териториї АПВ у тим року обезпечени за виводзачох явних роботох котри анґажую нєзанятих з евиденциї НЗС. Тота мира активней политики обезпечованя роботи подрозумює запровадзованє активносцох з хторима ше занїма виводзач, а циль муши буц у дружтвеним интересу. Явни роботи можу буц у социялних, гуманитарних, културних обласцох, у отримованю и защити животного штредку. Приявиц ше можу привредни дружтва, поднїмателє и здруженя гражданох, найпознєйше по 18. марец.