НОВИ САД – У 44 предшколских установох, 383 основних и 131 штреднєй школи на териториї Автономней окраїни Войводини (АПВ) вчера, 1. септембра почал школски 2015/2016. рок. Наставу ше отримує на сербским и пейцох язикох националних меншинох – руским, словацким, мадяским, румунским и горватским язику.
Школи у хторих ше отримує наставу на меншинским язику, а нє маю достаточне число школярох за отверанє окремних оддзелєньох, треба же би ше явели до Секретарияту же би достали согласносц за отверанє оддзелєня хторе будзе мац менєй як 15 школярох. Як гварел Нїлаш, потераз сцигли 53 вимоги зоз основних и 11 вимоги зоз штреднїх школох.
З тей нагоди подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш на конференциї за новинарох медзи иншим бешедовал и о настави на язикох националних меншинох, та наявел же ше роби на запровадзованю билинґвалней настави, а плановане же би ше уведло и наставу на анґлийским и язикох националних меншинох.
Нїлаш наведол и податок же ше предшколске образованє отримує у 44-ох установох, а обовязну пририхтуюцу програму будзе слухац за 3 одсто менєй дзеци як влонї.