Прешлей нєдзелї почали пририхтованя фодбалерох Русина за нове першенство. Тренира ше пейц раз тижньово, а потим ше бави контролни змаганя. У першим контролним змаганю процив екипи ФК „Кула” на Ярашу видзене добре бависко, було вельо нагоди за ґол, алє и ґолманє обидвох екипох були розположени, та ґоли нє було.
У медзичаше, и вредни спортисти и шицки други у тих горуцих дньох глєдаю ошвиженє.
Вербаски Центер за физичну културу „Драґо Йовович” и того лєта гражданом понука цалодньове ошвиженє на трох отворених базенох.
Того року лєтнї базени почали робиц ище 6. юния, а на початку сезони предлужени роботни час, та ше гражданє можу купац од 8 годзин рано та по 18,30 , а през викенд по 19 годзин.
Цена уходнїци 130 динари, нє пременєна є у одношеню на прешли рок, а за 15 уходи треба видвоїц 1 500 динари. Окрем того, дзеци до 7 роки нє плаца уход на базен.
