НОВИ САД – У Театралней сали Ґимназиї ”Лаза Костич” у Новим Садзе вчера вечар почал Дванасти Руски фестивал малих сценских формох ”Дюра Папгаргаї”, хтори будзе закончени на ютре, 7. децембра, з преглашеньом трох найлєпших представох по думаню публики.
У конкуренциї за награди 5 представи – єдна триодрама, два дуодрами и два монодрами, витворени у продукциї КПД ”ДОК” з Коцура, КУД ”Яким Гарди” з Петровцох, з Горватскей, Театру „Ирена Колєсар” Дружтва Руснацох у Сримскей Митровици, ґлумцох з Коцура и Руского Керестура у стенд-ап комедиї и Етно-клубу „Одняте од забуца” з Коцура. Як госц на Фестивалє наступа РНТ „Петро Ризнич Дядя”.
Фестивал нєшка почал з отвераньом вистави малюнкох з Подобовей колониї Месного одбору Рускей матки (МО РМ) и Етно-клубу ”Одняте од забуца”, хтора поставена у голу Театралней сали. Виставу отворела предсидателька МО РМ Коцур Моника Гарди, а з тей нагоди пригодни текст пречитала и Сандра Самочета, єдна з наймладших учашнїкох Колониї.
На сцени у Театралней сали зборнїк драмских текстох з дотерашнїх Фестивалох з назву „Масонка” у мено видавателя представели директорка и редактор Видавательней дїлносци НВУ „Руске слово” Мартица Тамаш и Микола Шанта, у мено авторох Ирина Гарди Ковачевич, а у мено орґанизатора Фестивалу Миломир Шайтош. Шветочносц з вецей музичнима точками прикрашела часц членох Националного оркестру Руснацох, под рукводительством Мирона Сивча.
Фестивал привитала народна посланїца и членїца Националного совиту Руснацох Олена Папуґа, на отвераню присуствовал и Павле Зуровац спред Гордскей управи Нового Саду, а урядово го отворел режисер з Нового Саду Звонимир Павлович.
Вчера наступели млади ґлумици-основношколки з Коцура – Силвия Маґоч, Дарина Михняк и Катарина Фейди, котри обавели представу „На терапиї у Милеви”, чия авторка и режисерка спомнута Фейдийова.
Нєшка на Фестивалє наступаю Петровчанє, потим РНТ „Петро Ризнич Дядя”, та Владимир Балащак зоз Сримскей Митровици, а на ютре у стенд-ап комедиї Иґор Горняк Пишта з Коцура и Себастиян Няради Себо з Керестура, а на концу Фестивалу Моника Гарди з Коцура. Початок першей представи на 19 годзин.
Фестивал орґанизую Матка-Дружтво Руснацох Нового Саду-Войводини и Городски одбор Рускей матки Нови Сад.
