НОВИ САД – Всоботу, 18. априла, предсидатель Матици сербскей, проф. др Драґан Станич, на Новосадским сайме отворел 21. Медзинародни салон кнїжкох и 20. Виставу уметносцох „Арт Експо”, хтори тирваю по 25. април.
На Салонє кнїжкох участвую литературни творителє, видавательни, образовни и медийни хижи, а представени найновши виданя з белетристики, популарней, фаховей и науковей литератури, виданя за ученє странских язикох, литература за дзеци, рижни приручнїки. Значна часц Салону кнїжкох и Литературна манифестация „Днї Лази Костича”, а новосц тогорочного Салону програма „Стрип-салон”.
На заєднїцким штанду видавательох на язикох националних заєднїцох Покраїнского секретарияту за културу и явне информованє виложени и виданя на руским язику.
На Вистави уметносцох „Арт Експо” участвую уметнїки и ґалериї, колекционере и антикваре.