ПЕТРОВЦИ – Нєшка на 20 годзин з приказом обичаю рубаня майского древка, у Етноґрафскей збирки у Петровцох почина 42. „Петровски дзвон”, найвисша културна манифестация Руснацох у Републики Горватскей (РГ), а тирва по нєдзелю, 7. юний. Фестивал орґанизую Союз Русинох РГ Горватскей и КУД „Яким Гарди” з Петровцох, под покровительством Совиту за национални меншини РГ, а з финансийну потримовку Вуковарско-сримскей жупаниї и Општини Боґдановци.
Штерацец други „Петровски дзвон” будзе отримани у рамикох означованя 65-рочнїци КУД „Яким Гарди” з Петровцох, 85 рокох народзеня Силву Ерделя, 85 рокох народзеня Владимира Костелника и 85 рокох народзеня Йозафата Колбаса, чийо ювилеї буду окреме означени на ютре, на Музично-литературним вечаре Руснацох у РГ.
На манифестациї ютре будзе и фодбалске змаганє ветеранох ФК „Петровци” и „Русину” з Руского Керестура, буду отворени вецей вистави подобових роботох и фотоґрафийох авторох Руснацох з Горватскей, а пред спомнутим Музично-литературним стретнуцом будзе и промоция вецей кнїжкох.
На нєдзелю на 11 годзин почнє манифестация дзецох „Петровски дзвончок”, а на 15 г. смотра музично-фолклорней творчосци Руснацох у Горватскей „Петровски дзвон 2015”, на хторим наступя и госци з иножемства – ансамбл „Кичера” з Медзилаборцох, зоз Словацкей и КУД „Дюра Киш” зоз Шиду, зоз Сербиї, як и ансамбли других народох и меншинох у Горватскей.