КУЛА – Скупштина општини (СО) Кула вчера, 30. октобра, прилапела други тогорочни ребаланс општинского буджету у хторим, як потолковал заменїк предсидателя Општини Велибор Милоїчич, у одношеню на скорейши приходи звекшани за 350 милиони динари, так же тераз цалосни прилїв утвердзени на милиярду 742 милиони 826 000 динари.
– Шицки звекшаня з тим буджетом унапрямени на нови инвестициї и чечуци оправяня и отримованя, бо за плаци средства зменшани за коло 6 милиони динари, а прейґ 850 милиони динари предвидзени за капитални проєкти, набавку опреми и отримованє, як и инвестицийне отримованє – гварел Милоїчич толкуюци Предлог ребалансу буджету, додаваюци же кулска каса солвентна и кажди рахунок ше виплацує за три днї.
– Пошвидко почнє конкретне ришованє найвекшого еколоґийного проблему у нашей општини, односно у Червинки и Кули – заґадзеносц Беґейцу, понеже обезпечени пенєж за вибудов поцискуюцого канализацийного воду и за законченє канализацийних мрежох у Кули и Червинки. Обезпечени шицки средства и пририхтана документация, та виглядне же до конца того рока будзе розписана и явна набавка за тот капитални проєкт и же на яр годни почац роботи – гварел заменїк предсидателя Општини, наглашуюци же з терашнїм ребалансом у тим року за тоту роботу обезпечени 327 милиони 329 000 динари, а нарок буду опредзелєни 276 милиони 151 000 динари.
– Општина Кула дотераз нїґда нє мала инвестицию такей велькосци, бо слово о пейц милиони еври, хтори обезпечени у тим и у идуцих двох рокох. За ришованє того проблему ше закладали шицки дотерашнї власци, а терашнєй ше то поспиши и конкретно почац ришовац – гварел Велибор Милоїчич на вчерайшей схадзки СО Кула, на хторей одборнїки принєсли вецей одлуки, о хторих Рутенпрес будзе информовац идуцого тижня.