Иван Молнар, млади Дюрдьовчан, хтори ше занїма зоз оправяньом компютерох, а тиж є активни член Културно-уметнїцкого дружтва „Тарас Шевченко”.
Ивана ище у дзецинстве прицаговали компютерски видео-бависка, а з роками ше вше баржей интересовал и за компютери.
− Свой перши компютер сом достал концом седмей класи и то ме барз обрадовало и мотивовало же бим преширел свойо знанє о компютерох − здогадує ше Иван.
Технїка нєпреривно напредує, а дзецом нєшка компютери доступни одмалючка. Прето им нє знача вельо и нє представяю нїч окремне, як цо представяли Иванови и старшим ґенерацийом. Пред тим як достал компютер, Иван порядно провадзел компютерски часописи. Так ше информовал, алє и учел. Кед ше мал одлучиц же до хторей штреднєй школи ше упише, одлучел ше за напрям електро-технїчар рахункарох и уписал ше до штреднєй Електро-технїчней школи „Михайло Пупин” у Новим Садзе.
− У школи сом вельо научел и достал мотивацию же бим и далєй виглєдовал, учел и усовершовал ше. Нє планирал сом же будзем робиц у тей обласци, алє то фах у хторим сом ше пренашол. Робим з любову и нє чежко ми робиц – гвари вон.
Закукуюци до свойого комютера, Молнар перше почал сам отримовац свой компютер − на початку сервисовал оперативни системи, а познєйше, кед почал до штреднєй школи, почал оправяц и гардверску часц рахункарох. Як гвари, нєшка комплетно сервисує рахункари.
Член є КУД „Тарас Шевченко” од дзецинства (на слики и Кристина Малїк)
РОБОТА НАЙВАЖНЄЙША
Велї млади нєшка прешвечени же без факултетскей дипломи барз чежко, а часто аж и нєможлїве пренайсц роботу, медзитим, то нє правило. Иван закончел основну школу у Дюрдьове на руским язику з Вукову диплому, а у штренєй школи тиж мал одлични успих. Вшелїяк же улогу факултетского образованя нє треба занєдзбац, алє же то нє єдина драга по хторей ше муши исц же би ше посцигло успих, доказало искуство Ивана Молнара.
− Уписал сом ше на Факултет технїчних наукох у Новим Садзе, напрям електротехнїка, телекомуникациї и енерґетика, алє уж после даскелїх мешацох сом видзел же ше на факултету нє учи тото цо сом обчековал. Думал сом же на факултету будзем учиц дацо контретне и же здобудзем вецей применлївого, практичного знаня. Теди сом ше дакус розчаровал, та сом ше пошвидко почал робиц у єдним сервису рахункарох, и нє побановал сом − гвари Иван.
КРЕАТИВНОСЦ И АКТИВНОСЦ
У штвартей класи основней школи почал танцовац у фолклорней секциї КУД „Тарас Шевченко”, дзе є и нєшка активни фолклораш, алє и орґанизатор шицких активносцох хтори реализую млади з того Дружтва. Иван тиж талантовани за рисованє. У основней школи ше визначовал з рисунками, а за дзепоєдни бул и наградзени на даскелїх конкурсох. Медзитим, вецей нє рисує − тот талант унапрямел на дацо инше, а то дизайн. Иван дизайнер шицких плакатох и 
промотивних видео-записох за журки и литературни вечари хтори орґанизую млади з дюрдьовского КУД-а. Окреме интересантни його дизайн маїцох хтори члени Дружтва промовую на рижних путованьох и турнейох.
Рахункари поставаю вше заступенши у шицких сферох нашого живота, та ше Иван нє муши старац же чи будзе мац роботи. У тей хвильки є заняти у Новим Садзе у єднєй предавальнї рахункарох и других електричних ушореньох, а компютери оправя и дома.
− Вше виходзи дацо нове и вше єст роботи. Нєшка уж кажде обисце ма компютер и думам же будучносц у тим. Задовольни сом з роботу, а єдна од моїх идейох же бим єдного дня отворел свой приватни сервис рахункарох − закончує Иван Молнар.