НОВИ САД – Представителє орґанизациї цивилного дружтва „Локална акция“ обишли школи у пейц войводянских городох, дзе штредньошколцом презентовали публикацию о толеранциї „На слово, на слово“. Окремни акцент бул на указованю младим як маю препознац насилство и як у таких ситуацийох треба реаґовац.
Циль проєкту младим представиц поняца толеранциї, предрозсудкох, мултикултуралносци и другого з чим ше можу зочиц у одрастаню, гварел Александар Борбаш з „Локалней акциї“ на представяню у Медия центре Войводини. Вон визначел же постої уплїв екстремистичних ґрупох на младих у Войводини, алє же вони то нє препознаваю як проблем.
Проєкт витворени з вецей аспектох, до ньго були уключени психолоґове, педаґоґове, та штредньошколци котри му допринєсли з илустрациями.
Под час нащивох школом, активисти „Локалней акциї“ дознали же при младих барз присутне насилство хторе ше манифестує у рижних формох, а найчастейше пре розлики у националней, вирскей, лєбо другей окремносци.