Предложене основац реґионални „Рутен радио”

автор сен
1k Опатрене

РУСКИ КЕРЕСТУР – Запровадзованє добрей и функционалней мрежи у обласци информованя, сотруднїцтво медзи рускима медиями, очуванє постояцого уровню информованя з можлївосцу його злєпшаня – цилї хтори члени Одбору за информованє Националного совиту (НС) Руснацох и представителє подручних канцеларийох (ПК) Совиту винєсли на заєднїцкей роботней схадзки хтора отримана всоботу, 29. авґуста у Руским Керестуре.

Початок схадзки бул резервовани за кратке спатранє стану у местох дзе жию Руснаци, а пошвидко ше визначела и главна тема – предкладанє снованя реґионалного радия, з назву „Рутен радио”.

Попри членох Одбору за информованє, на чолє з його предсидательом Иваном Сабадошом, та представительох ПК, на векшей часци схадзки того одбору присуствовал и предсидатель НС Славко Рац, котри и винєсол спомнути предлог о „Рутен радию”

Як поведзене, з процесом приватизациї локалних медийох хтори емитую програми и на язикох националних меншинох, постало нєизвесне чи ше предлужи информованє по руски, та тота тема визначена як тераз найважнєйша.

3-Informovanje-02

Члени Одбору потримали идею о снованю такого радия, алє розпатрели ище даскельо можлївосци за предлуженє електронского информованя по руски на реґионалним уровню. Єдни з нїх же би ше информованє по руски отримало прейґ запровадзованя партнерства з постояцим медийом после його приватизациї, а кед то нє годно, друга опция би була можлївосц преширйованя руских програмох на Радио-телевизиї Войводини з нєзависну продукцию.

Порадзене же ше будзе робиц на сполньованю условийох за доставанє радийскей фреквенциї, а конкурс за розподзельованє фреквенцийох будзе идуцого року.

За шицки медиї треба обезпечиц стаємни приходи, а єдно з ришеньох то конкурованє до европских фондох, бо, як зауважене на схадзки, тераз ше нашо медиї операю лєм на пенєж хтори доставаю од держави, а треба глєдац и други жридла финансованя, гварене на заєднїцкей схадзки. На тей основи, порадзене же ше направи лїстину фондох и фондацийох хтори финансую активносци яки ма Одбор за информованє.

Члени Одбору бешедовали и о потреби отримованя едукацийох пре творенє проєктного тиму хтори би писал проєкти, провадзел актуални конкурси за цали НС, та и други руски институциї, а исту задумку ма и Одбор за културу.

3-Informovanje-03

 

ПОВЯЗАНИ ТЕКСТИ