НОВИ САД – У Руским културним центре (РКЦ) у Новим Садзе, всоботу, 18. априла, пред красним числом публики отримана премиєра представи „Круцина (або курва)” Танкреда Дорста, у адаптациї и режиї Звонимира Павловича.
У препознатлївей Павловичовей режиї виприповедана абсурдна и ґротескна фарса о зраженю явного и приватного интересу. Место збуваня спод огромней схили коло котрей ще цага авантуристична и найопаснєйша круцина на швеце, а на самим дну жию двоме браца Рудолф и Антон. Идилични и допити живот прериваю з часу на час нєосторожни вожаче, хтори ше од горе падаю до бездни, а браца вицагую мертвих и ховаю их на приватним теметове. Цалком случайно, до бездни сцигує и началнїк Министерства транспорту др Криґбаум, котри прежиє нєщесце.
У представи ґлумя Славко Бучко, Игор Горняк и Борис Фейди, за музику задлужени Мирослав Пап, дизайнер шветла Ириней Гудак, костими пририхтала Боґданка Сопка, а асистент режиї Ненад Илич.
Суфлер Александра Живкович, за сцену и реквизити задлужени Неманя Павлович, продуцент представи Владимир Сивч, орґанизатор Томислав Горняк, док видео-ефекти виробели „Неша и Тибор”.
