Пре подлу хвилю слабши резултати

автор зам
736 Опатрене

БЕОҐРАД/РУСКИ КЕРЕСТУР – На Першенстве Сербиї за младших пионирох, хторе внєдзелю, 27. септембра отримане на стадионє Воєней академиї у Беоґрадзе, Атлетски клуб Русин з Руского Керестура представяли шесцеро атлетичаре.

Як Рутенпрес дознава од тренерки атлетичарох Санї Тиркайла, барз подла, дижджовна хвиля шицким учашнїком онєможлївела посцигованє замеркованших резултатох, так же и медзи керестурскима атлетичарами найлєпши пласман – штварте место – витворела Кристина Катона у скаканю до висока, з прескочену палїцу на висини 1,40 метери.

Кристини то резултат спод єй уровню, понеже нєдавно прескочела палїцу на 1,51 метери, з чим ше пласовала на финалне змаганє за Куп Сербиї, у Крушевцу 3. октобра.

Тони Пашо завжал 5. место у руцаню кулї, хтору доруцел на 7,33 м, Микола Накич у скаканю до висока завжал 6. место (прескочел 1,30 м), Неманя Стойков у руцаню вортексу завжал 10 место (руцел 34,80 м), Дарко Надь у скаканю до далєка зоз доскоченима 3,78 м бул 11., а Микола Папуґа ше обеговал на 60 м, алє на тим змаганю нє вошол до финалу.

ПОВЯЗАНИ ТЕКСТИ