ВЕРБАС – У КПД „Карпати” у Вербаше вчера вечар отримани цаловечарши концерт наймладших членох Дружтва, з назву „Привит лєту”, на хторим ше вони представели з танцами, рецитациями и шпиванками, а як госци, на концерту з вецей музично-танєчнима точками участвовал дзецински фолклорни ансамбл КУД „Иван Сенюк” з Кули.
Попри дзецинскей танєчней секциї „Карпатох” участвовали и дзеци котри у Вербаше факултативно виучую руски и українски язик, а пририхтали их учительки Славица Мали, Оля Станков и Ґалина Вуячич.
Домашнїх провадзел оркестер „Стари Вербас”, а з нагоди концерту, дзеци котри факултативно виучую руски язик и школяр Петро Медєши пририхтали виставу рисункох.
Учашнїкох и публику на програми привитали предсидатель Националного совиту Українцох Йозо Сапун, директорка НВУ „Руске слово” Мартица Тамаш, старовербаски парох о. Алексий Гудак и заменїца предсидателя КПД „Карпати” Єлена Кузма.
Хореоґрафиї у виводзеню дзецинскей фолклорней секциї КПД „Карпати” пририхтала Ирена Скубан, а на концу програми, домашнї з Вербасу и госци з Кули вєдно одшпивали шпиванку „У швеце постої єдно царство”.
