РУСКИ КЕРЕСТУР – На своєй пиятей порядней схадзки всоботу, 12. септембра, на хторей у Руским Керестуре присуствовали 15 з 19 членох, Национални совит (НС) Руснацох, под предшедованьом предсидателя Совиту Славка Раца, прилапел вименку Финансийного плану НС за тот рок, вибрал окончователя ревизиї свойого финансийного дїлованя за 2015. рок, а дал и позитивне думанє о вименкох Финансийного плану Заводу за културу войводянских Руснацох (ВР).
До вименка Финансийного плану НС пришло пре за коло 14 000 динари векши приходи од Покраїни Войводини, так же цалосни план Совиту тераз виноши 13 милиони 001 016 динари. Спомедзи трох понукнуцох, за ревизора финансийного дїлованя Совиту вибране Дружтво за рахунководство и ревизию „Ревизия Плус Про” з Беоґраду, хторе уж треци рок роби ревизию Совиту, а пенєж за тоту роботу обезпечує Канцелария за людски и меншински права.
Пре прилапйованє двох проєктох з хторима конкуровал, звекшани и Финансийни план Заводу за културу ВР. Завод за проєкт „Приручна библиотека Руснацох – Формованє фонду руских кнїжкох” од Министерства култури и информованя достанє коло 474 000 динари, а за видаванє нового компакт-диску Националного оркестру Руснацох 200 000 динари од Городу Нови Сад.
На схадзки потвердзени и вецей одлуки Вивершного одбору (ВО) НС о предкладаню проєктох за софинансованє, хтори на конкурси Министерства култури и информованя, вецей покраїнских секретариятох, та Городу Нови Сад послали нашо установи и здруженя. Тиж потвердзена и Одлука ВО о даваню предходней согласноци НС на вибор Зорици Малацко за директора ОШ „Чаки Лайош” у Бачкей Тополї.
Член НС Мирослав Кевежди, котри источашнє и член Комисиї за опредзельованє средствох по конкурсох при Министертве култури и ноформованя, з тей нагоди спозорел же Руснаци посилаю барз мало проєкти до Министерства, алє и же су реалитивно слабо написани и нє у складзе з пропозициями конкурсох.
Наглашел же руски проєкти средства по тих конкурсох найвецей доставаю углавним „на традицийносц”, а нє за ориґинални идеї, лєбо за проєкти за сотруднїцтво з другима, на цо Министерство тераз дава векшу увагу. Прето, як то визначовал и на нєдавно отриманей заєднїцкей роботней схадзки ресорних одборох и представительох подручних канцеларийох НС, потребне „змоцнїц” конкурси Руснацох, а предложел и же би Координация националних совитох од Министерства култури и информованя вимагала опредзельованє векших средствох за културну дїялносц националних меншинох.
И Кевежди и други члени Совиту виражели нєзадовольство же орґани до хторих ше конкурує, на доставанє думаня од националних совитох тераз посилаю лєм назви, лєбо барз редуковани проєкти з хторима ше конкурує, та би и вимога за вименку такей пракси мала буц єден зоз задаткох Координациї националних совитох.