КУЛА – Скупштина општини (СО) Кула на вчерайшей схадзки принєла Програму розвою спорту у општини од 2016. по 2018. рок, як стратеґийни и обовязуюци документ у тей обласци за орґани општини, без огляду хто будзе на власци, гварел у толкованю Програми заменїк предсидателя Општини Кула Велибор Милоїчич.
Милоїчич на схадзки СО Кула припознал же таки документ требало принєсц скорей, алє наглаше же є у складзе зоз Законом о спорту. Два главни напрями стратеґиї розвою спорту у кулскей општини буду його омасовйованє и укладанє до злєпшованя спортскей инфраструктури, за цо з буджетом Општини уж за тот рок опредзелєни прейґ 100 милиони динари.
На вчерайшей схадзки принєшена и Одлука о порушованю поступку за ликвидованє Аґенциї за розвой Општини Кула, односно за єй гашенє, а у складзе зоз Законом о максималним чишлє занятих у явним секторе, односно у системи локалней самоуправи. Роботу Аґенциї пребера Канцелария за локални економски розвой Општини, дзе прешли тройо з 5-их занятих, док двойо розпоредзени до других орґанизацийох.
СО Кула вчера дала согласносц на програми роботи з финансийнима планами за 2016. рок установох у култури хторим є снователь – Народней библиотеки Кула, Културного центру Кула, Дому култури Червинка, Дому култури Сивец и Дому култури Руски Керестур, як и Центру за социялну роботу и Спортского центру Червинка.
Вчера менована и єденацчленова стаємна Општинска виберанкова комисия, у хторей члени (и їх заменїки) з одборнїцких ґрупох срозмирно їх заступеносци у локалним парламенту. За предсидательку Комисиї менована дипл. правнїца Невенка Рабренович, а за заменїцу дипл. правнїца Наташа Спасич, обидва на предлог векшинскей Сербскей напредней странки.
