НОВИ САД – Будуци студенти ше уж почали пририхтовац за приємни испити, и у Новим Садзе приватни два годзини з математики, сербского и анґлийского язика коштаю од 850 до 1 200 динари, а з хемиї и биолоґиї су дакус драгши – найменєй тисяч динари, кельо коштаю и годзини з физики. Пририхтуюца настава на факултетох Новосадского универзитету лєбо безплатна, лєбо кошта од 10 000 до 30 000 динари.
Пририхтуюца настава з математики, хемиї, економики и биолоґиї на Польопривредним факултету будзе 12. и 19. марца, та 2. и 9. априла и 11. юния.
Безплатни пририхтованя з математики и хемиї на Технолоґийним факултету буду од априла по юний, а на Природно-математичним безплатни пририхтованя з математики почали 30. януара и заинтересовани ше и далєй можу приключиц. Пририхтованя з хемиї почню 20. фебруара.
На Факултету технїчних наукох пририхтуюца настава з математики кошта 12 500 динари, на Факултету спорту вона будзе отримана у юнию и найвироятнейше будзе коштац 10 000 динари, док на Медицинским факултету 30 000 динари.
Пририхтованя нєт, лєбо ше ище нє познате чи их будзе на Правним и Филозофским факултету, на Академиї уметносци, Економским факултету, Педаґоґийним у Зомборе, Технїчним у Зренянину, Будовательним у Суботици, алє шицки потребни информациї мож достац на студентских службох, на сайтох факултетох, лєбо на їх урядових Фейсбук бокох.