КОЦУР – Вчера вечар у валалскей Читальнї у Коцуре отримана промоция интерреґиионалней моноґрафиї „Коляди Русинох/Руснацох/Лемкох: писнї на чесц Рождества Исуса Христа”, троязичного капиталного проєкту Шветовей ради Русинох/Руснацох/Лемкох. Вчарайша промоция кнїжки була перша у нашей держави, а орґанизаовали ю КПД „ДОК”, Месни одбор Рускей матки Коцур и Етно-клуб „Одняте од забуца”.
На промоциї о кнїжки бешедовали проф. др. Михайло Фейса, єден з авторох уключених до проєкту и Аранка Медєши, котра тиж допринєсла моноґрафиї, як и Моника Гарди. Послухана и часц колядох з приложеного компакт-диску.
Ношитель того проєкту бул Иван Чижмар зоз Словацкей, а публикацию составели авторе з осем державох у хторих жию Руснаци – зоз Сербиї, України, Словацкей, Польскей, Мадярскей, Румуниї, Горватскей и Сиверней Америки.
Ґу моноґрафиї приложени и компакт-диск на хторим зазначене автентичне шпиванє колядох, як и мапа руских населєньох з 1906. року, на хторей зазначени шицки места з хторих тоти коляди позберани.