НОВИ САД – Як за новосадски „Дневник” тих дньох гварел член Городскей ради Нови Сад задлужени за образованє Владимир Єлич, Предшколска установа (ПУ) „Радосне дзецинство” од нового школского року будзе подзелєна на осем поєдинєчни предшколски установи.
Терашня ПУ „Радосне дзецинство” зоз 69 дзецинскима заградками на териториї Нового Саду будзе розформована, а капацитет будуцих осем установох останє исти, з до 100 воспитнима ґрупами. Будуци ПУ буду наволани по писательох за дзеци, а место терашнього єдного, з нїма буду руководзиц осем директоре и штирме помоцнїки, а ПУ и надалєй буду у компетенциї Городу.
Як гварел Єлич, до тих пременкох придзе пре розтерховйованє постояцей системи, цо ше одноши и на одпущованє звишкох занятих у администрациї и централней управи ПУ, а по трансформованю число занятих нє будзе векше як тераз. Наявел же ше о тих пременкох будзе розправяц уж на шлїдуюцей схадзки Скупштини Городу.
Остатнї 6 роки ПУ, як велька орґанизация, представя терху Городу, та подзелєнє на менши цалосци оможлїви ефикаснєйше функционованє, алє и векшу медзисобну конкуренцию, гварел Єлич, надпоминаюци же городска власц роздума и о явно-приватним партнерстве за предшколски установи.