НОВИ САД – Вчера рано на Варадинским мосце у Новим Садзе виложени транспарент на хторих писало „Нє сцеме Цецу, сцеме роботни места”, преноши 021. То ище єдна з неґативних реакцийох на наяву же за дочек Нового року по юлиянским календаре на Площи шлєбоди будзе шпивац фолк-шпивачка Цеца Ражнатович.
Крем рижних орґанизацийох и здруженьох гражданох, коло концерту ше „дипломатски” вадза и политични странки. Ище вше урядово нє обявене кельо будзе коштац Цецов наступ, алє городска власц твердзи же и тот дочек Нового року будзе виплацени зоз спонзорствох.
Политични странки видаваю сообщеня, дзе СНС преволала Войводянску партию и ЛСВ же нє маю право поставяц питаня о финансийох, бо и сами маю длуства спрам Городу. Лиґа одвитовала же вимири шицки длуства, алє им нє ясне прецо ше одволує СНС, а нє Городска власц.
Городски одбор СНС обвинєл ДС же зоз своїма нападами на городоначалнїка и СНС увредзує шицких Новосадянох. Одбор гвари же городоначалнїк Милош Вучевич уведол праксу же би ше средства за орґанизованє дочеку нових рокох обезпечовало од спонзорох, а нє з городского буджету. Тиж так, СНС обвинєл ДС же док була на власци у Новим Садзе, трошени пенєж гражданох за концерти хтори нє були нащивени.