НОВИ САД – Тих дньох пошвидшани роботи на ушореню простору у новосадским Руским културним центре (РКЦ), дзе окрем фарбеня столариї, остало обилїц мури, офарбиц радиятори и положиц ламинат у просториї хтору ше пред даскельома мешацами почало реновирац.
– Обчековали зме же вецей людзе приду на акцию, но вироятно пре обовязки на роботи нє можу присц. Но, остатнї днї од рана до вечара вше дахто ту и кельо може – помага. Остало нам докончиц ище даскельо роботи, а после їх фарбеня, радиятори треба врацици на место, та би ше нам здали пейцме-шейсцме хлопи як помоц – гвари предсидателька Управного одбору РКЦ Наташа Макаї Мудрох, котра тих дньох окончує и функцию заменїка директора Центру.
З роботами ше понагля, бо на пияток вечар у Матки, як новосадски Руснаци популарно волаю РКЦ, запланована роботня з дзецми и їх учительками, на вечар Бал под масками, та потамаль шицко муши буц закончене и попораєне. Прето апелую на Новосадянох же би пришли помогнуц, окреме на штварток и пияток, на закончовнє роботох.
Активиста у РКЦ Борис Фейди на акцию поволал и своїх приятельох, студентох з Обреновцу, котри дзечнє пришли и помагали, як и други ентузиясти котри приходза помогнуц на даскельо годзини.
