НОВИ САД – Прешлого и у першей половки 2015. року, Покраїнски секретарият за спорт и младеж робел на промоциї спорту, физичней култури и здравого способу живота у войводянских основних и штреднїх школох, та анализовал стан спортских обєктох у школох.
Ресорна секретарка Мариника Тепич гвари же анализовани 580 школи у Войводини и дошло ше до податкох же аж 110 школи нє маю физкултурну салу, а анї єдна нє сполнює стандарди потребни за запровадзованє физичного воспитаня, цо ше углавним одноши на нєдостаточну безпечносц и нєопременосц салох. Прето Секретарият за остатнї рок и пол уложел 185 милиони динари до опреманя, оправяня, адаптацию школских салох, а таку праксу планує предлужиц, наглашела Тепичова.
– Удало нам ше ревитализовац Спортску олимпияду школскей младежи Войводини, анализовали зме спортски обєкти у войводянских основних школох, порушали програму ”Активни школи” и ”Спорт плус”. У рамикох проєкту ”Спорт плус”, як промоциї нових спортох и дисциплинох, отримане и покраїнске першенство у атлетики за школярох од першей по шесту класу, як и фахово совитованє на Факултету за спорт и физичне воспитанє – гварела на вчерайшей конференциї за медиї покраїнска секретарка Мариника Тепич.