РУСКИ КЕРЕСТУР – У єденастим колє Подручней фодбалскей лиґи Зомбор, внєдзелю 27. октобра, пред домашню публику ФК „Русинˮ победзел ФК „Будучносцˮ зоз Младенова зоз резултатом 2:1 (2:1).
У першим полчасу, судия у 13. минути запискал индиректне бице, та зоз коло 16 метерох госци дали красни ґол коло „живого мураˮ. Без огляду на прияти ґол слика на Ярашу ше нє пременєла по 20. минуту кед Деян Давидович вировнал резултат на 1:1. У 33. минути, исти бавяч дал ище єден ґол, а то источашнє бул и конєчни резултат. На нєдзельовим змаганю, по штири жовти картони додзелєни и домашнєй, и госцуюцей екипи.
Русин наступел у составе: М. Надь, Д. Веселинович, Б. Голик, Б. Надь, Й. Гарди, А. Малацко, К. Боднар, О. Маркович, С. Дюканович, Д. Давидович, Д. Будински, а на замени: Ф. Тома, И. Маньош, Ж. Виславски. Судия: Йовица Єрилович, Оґнєн Матич и Йован Єрич.
Зоз тоту побиду, Русин после одбавених 11 змаганьох на 8. месце на таблїчки зоз 17 бодами, а на нєдзелю 3. новембра Русин ознова будзе домашнї, кед наступи процив ФК „Маґличˮ зоз Бачкого Маґличу хтори хвильково на 14. месце.