ҐЛОЖАН/РУСКИ КЕРЕСТУР – Екипа ФК „Русин” прешлей нєдзелї, 29. мая, у 28. колє Подручней фодбалскей лиґи Зомбор, поражена у Ґложану од екипи ФК „Будучносц” з резултатом 2:0 (1:0), алє и далєй остава на 4 месце на таблїчки. Ґоли за домашнїх у 20. минути посцигли Жембери и у 55. Бркляча.
За Русин наступели Кронич Деян, Тома Стефан, Голик Боян, Иличич Марио, Малацко Андрей, Тома Александар, Кулич Неманя, Бранкович Боян, Сушич Дарко, Саянкович Матей, и Маркович Оґнєн. Пред конєц змаганя як замена вошли и Зорич Александар и Дудаш Андрей.
И у тим змаганю тренер Златко Саянкович нагоди дал досц подмладзеней екипи понеже одсуствовали шейсцме стандардни першотимци, а то допущує и нєдалєки конєц першенства.
У шлїдуюцим предостатнїм колє на нєдзелю, 12. юния Русин на Ярашу дочекує Полет зоз Каравукова, а змаганє почнє на 17,30 годзин.