НОВИ САД – У Предшколскей установи „Радосне дзецинство”, у обєкту „Палчочка” у Новим Садзе стреду, 18. новембра отримана перша годзина руского язика за предшколски дзеци у тим школским року. На першим стретнуцу були аж двацецеро дзеци, од штири до седем роки.
Настава надалєй будзе поряднє – кажду стреду на 18 годзин, а з дзецми роби вихователька Александра Колбас.
Дзекуюци Дружтву за руски язик, литературу и културу, хторе орґанизує тоти активносци, а насампредз Ирини Папуґовей, превозидзени дзепоєдни почежкосци коло предлужованя факултативней настави за руски дзеци на предшколским уровню, так же и терашнї наймладши Новосадянє, як и вельо ґенерациї пред нїма, знова раз у тижню маю можлївосц бавиц ше, приповедац и шпивац по руски.