СТАКЧИН (СЛОВАЦКА) – На тогорочней туристично-културней манифестациї у Стакчину, у снїнским округу у Словацкей, єдна з главних атракцийох бул „руснацки гамбурґер”, як го наволали орґанизаторе, понеже мото манифестациї бул „Дзе хлєб и вода – там нєт гладу”.
„Руснацки гамбурґер” то швижо упечени хлєб намасцени з масцу, шкварочками и цибулю, а залївани є зоз швижу, бисту жридлову воду, понеже стакчински край познати и по найвекшим жридлу здравей води у штреднєй Европи. Но, як пишу реґионални новини „Словацки виход”, после „руснацкого гамбурґеру” нащивителє воду „розблажовали” и з добру домашню шлївовицу.
„Руснацки гамбурґер” правел општински одборнїк Михал Ґродза, а понукали го члени месного Фолклорного ансамблу „Бескид”.
Манифестация „Людзе под Настасом” треци рок орґанизована штредком мая, а на нєй приватнїки и фирми презентує рижни домашнї, уметнїцки и други виробки, орґанизовани креативно-уметнїцки роботнї за дзеци, як и културна програма.
Настас горске пасмо хторе почина при Стакчинє, а закончує ше при Вельким Березним у України. З тим то и побратимене место Стакчину, як и Лутовиско з Польскей, так же на манифестациї участвовали и представителє з тих местох. Стакчин ма статус општинского места.
Источашнє ту и вельки резервоар води Старина, а тота обласц позната и по тим же ма найвецей, аж дзешец воєни теметови з Першей и Другей шветовей войни, дзе теметов у Велькей Поляни и на найвисшим месце у штреднєй Европи.
