ДЮРДЬОВ – Вчера на 10 годзин символично отворени реновирани просториї Месней заєднїци (МЗ) Дюрдьов. Присутних, медзи нїма и предсидателя Општини Жабель Чедомира Божича, привитала предсидателька Совиту МЗ Леона Виславски и представела цо поробене.
Пооправяни шветочна сала, конк, санитарни ґузел, помоцна простория и єдна канцелария. Просториї обилєни, а дзе було потребне, положени ламинат, поставене квеце и малюнки. Шветочну салу годни хасновац шицки здруженя гражданох за свою роботу.
Предсидатель Општини Жабель Чедомир Божич похвалєл инициятиву Совиту МЗ Дюрдьов, визначел цо у остатнї час поробене у општини, а з тей нагоди присутних поволал и же би зоз своїма предкладанями участвовали у ришованю проблемох у своїм месце.
На сходзе присустовали и члени Совиту МЗ Дюрдьов, о. Йоаким Холошняй и о. Петар Дюкич, директорка ОШ „Йован Йованович Змай“ Мария Тртич, Сандра Пеїч Виславски спред ПУ „Дзецинство“, представителє локалних здруженьох и жителє Дюрдьова.
Реновиранє финансовала Општина Жабель, а виводзач роботох було подприємство „Фасадом“ зоз Жаблю.
