СНС абсолутна векшина у Народней скупштини

автор саб; фото: РТС
1.3k Опатрене

СЕРБИЯ – На основи прейґ 97 одсто обробеного виберанкового материялу, Републична виберанкова комисия (РВК) вчера сообщела же на позарядових виберанкох за нове зволанє Народней скупштини Републики Сербиї гласали  56,34 одсто зоз шейсц милиони 737 808 гражданох уписаних до Общого виберацкого списку, так же внєдзелю гласали три милиони 686 480 гражданє Сербиї.

По  истих прелиминарних резултатох найвецей гласи достала лїстина Сербскей напредней странки „Александар Вучич-Сербия победзує” – приблїжно  милион 780 000 гласи, цо коло 48,25 одсто тих цо гласали. Виберанкови резултат напредняком дава 131 посланїцки мандат, односно самостойну абсолутну векшину у Народней скупштини, хтора ма 250 места.

Парламентарни цензус прешли ище шейсц векшински лїстини, а народних посланїкох буду мац и  пейц лїстини з меншинским статусом. Од вєдно 20 лїстинох хтори участвовали на парламентарних виберанкох, спод цензуса остали осем лїстини.

Друга по достатим числу гласох лїстина „Ивица Дачич-Социялистична партия Сербиї (СПС), Єдинствена Сербия (ЄС)-Драґан Маркович Палма” з дацо вецей як 11 одсто, односно коло 406 000 гласами, цо ноши 30 мандати. Лїстина „Др Воїслав Шешель-Сербска радикална странка” достала приблїжно 297 000 гласи, цо 8,5 одсто, лєбо 21 мандат, а лїстина  „За праведну Сербию-Демократска странка (Нова, ДСГВ, ЗЗС)” дацо вецей як 223 000 гласи, односно 6 одсто, цо демократом дава 16 мандати. Лїстина „Досц було-Саша Радулович” достала приблїжно 220 700 гласи, коло 6 одсто, та вироятни тиж будзе мац 16 мандати.

Коалицийна лїстина „Борис Тадич, Чедомир Йованович-Союз за лєпшу Сербию-Либерално демократска партия, Лиґа социялдемократох Войводини, Социялдемократска странка” достала 185 500 гласи, цо дацо понад 5 одсто, односно  13 посланїцки места. Нє вельо менєй од 185 000 гласи, односно ровно 5 одсто, достала лїстина „Двери-Демократска странка Сербиї-Санда Рашкович Ивич-Бошко Обрадович”, хтора тиж будзе мац 13 посланїкох.

З меншинских лїстинох „Союз войводянских Мадярох-Иштван Пастор” достала коло 56 000 гласи – 1,5 одсто вкупного числа гласачох и будзе мац штирох народних посланїкох. Бошняцки лїстини „СДА Санджаку-Др Сулейман Уґлянин” и  „Муамер Зукорлич-Бошняцка демократска заєднїца Санджаку” достаню по два мандати, а албанска „Партия за демократске дїлованє-Ардита Синани” будзе мац єдного посланїка, кельо  и „Желєна странка”.

Представени резултати нє конєчни, а з оглядом же два лїстини блїзко коло цензуса, аж 100 одсто обробеного виберанкового материялу укаже розпорядок мандатох у Народней скупштини Сербиї.

Представителє вецей виберанкових лїстинох у виберанковим дню приявели нєправилносци у гласацким процесу – од технїчних проблемох по озбильни потупеня, як цо то купованє гласох и прицисок на гласачох, хтори компетентни орґани муша випитац. Медзитим, РВК дотераз достала лєм даскельо урядово прияви пре потупеня, а опозиция вчера придала урядову вимогу РВК же би їх представителє достали увид до комплетного виберанкового материялу, цо им будзе оможлївене.

Републична виберанкова комисия найпознєйше на штварток, 28. априла, у „Службеним глашнїку” обяви конєчни резултати парламентарних виберанкох у Сербиї.

ПОВЯЗАНИ ТЕКСТИ