РУСКИ КЕРЕСТУР – На веб-сайту Националного совиту Руснацох (www.rusini.rs), на його початним боку, вчера обявени резултати конкурсу Роботного цела за младеж Националного совиту Руснацох, односно опредзельованє средствох за софинансованє проєктох младих з наших местох. Конкурс тирвал до конца мая, сцигли 16 проєкти, средства опредзелєни за 15, а єден прешлїдзени Одбору за образованє Националного совиту. Роботне цело за проєкти по конкурсу на розполаганю мало 230 000 динари.
Найвецей – 50 000 динари, одобрене Туристичному здруженю Руски Керестур за орґанизованє Медзинародного волонтерского кампу у Руским Керестуре, док за Мултимедиялну манифестацию младих ”Дньовка”, Здруженю младих ”Пакт Рутенорум” з Руского Керестура одобрени 35 000 динари.
Здруженє гражданох ”Еко Ґерила” достанє 23 000 динари за проєкт садзеня, отримованя и преширйованя желєних поверхносцох у Новим Орахове.
За проєкт „Акция 2015”, чий ношитель Коцурске здруженє младих, опредзелєни 15 000 динари, а КПД ”Карпати” з Вербасу за проєкт ”Нарисуй свой швет” достанє 13 000 динари.
За Циклус креативних роботньох КУД ”Тарас Шевченко” з Дюрдьова достанє 12 000 динари, a по 10 000 динари за проєкти ”Гаваї парти” и ”Пижама парти”.
По 10 000 динари достаню и Форум младих Рускей матки з Нового Саду за ”Бал под масками”; КПД ”Карпати” з Вербасу за проєкт ”Цо упишеш?” и Туристичне здруженє Руски Керестур за проєкт ”Млади спорту”.
По 8 000 динари достаню Руски културни центер з Нового Саду за проєкти ”Дзе(нь) младосц(и) и ”Литерариюм”, Дружтво Руснацох у Суботици за проєкт ”Витайце у нас” и КПД ”Дюра Киш” зоз Шиду за проєкт ”Вечар сучасней рускей музики”.
Проєкт „Пестованє руского язика и култури” Дружтва за руски язик, литературу и културу Роботне цело за младеж прешлїдзело Одбору за образованє Националного совиту.