КУЛА – У просторийох Руского КУД „Др Гавриїл Костельник” у Кули, всоботу, 14. фебруара вечар отримане стретнуце двох здруженьох женох – домашнього „Идея” хторе роби у просторийох нашого кулского Дружтва, и „Байки” з Руского Керестура.
Тото перше урядове стретнуце двох здруженьох хтори ше занїмаю з подобнима активносцами орґанизоване пре упознаванє и черанє искуствох, а було и поради о наступних манифестацийох на хторих планую участвовац.
Домашнє Здруженє, у хторим нє лєм Рускинї, алє и други жени з Кули, предводзела предсидателька Серафина Бики, а керестурске Славица Катона. На стретнуцу були и членїци шпивацких ґрупох з КУД „Др Гавриїл Костельник” и керестурского Дому култури, та ше и зашпивало, з провадзеньом Еуфемиї Планкош на гармоники.
