ЕЧКА – У Ечки стреду, 18. новембра, отримане зашеданє Координациї националних совитох (НС-ох) националних заєднїцох у Сербиї, як пририхтованє представительох меншинских културних автономийох за наступну схадзку Роботного цела за виробок Акцийного плану за Поглавє 23 у прегваркох з ЕУ, хтора на пондзелок будзе у Беоґрадзе.
Як потолковал заменїк предсидателя Националного совиту Руснацох Йовґен Мудри, котри у мено Совиту присуствовал на спомнутим сходзе, седмеро представителє Координациї котри участвую у Роботним целу, презентую два предкладаня хтори дефиновани у Ечки.
Понеже шицки дотерашнї роботни вариянти Акцийного плану хтори циркулую у фаховей явносци нє уважовали предкладаня Координациї, тераз пририхтани предкладаня хтори ше операю на медзинародну Рамикову конвенцию о защити националних меншинох, хтору припознава и Република Сербия, а ма правнообовязуюци характер.
– На Координациї зме повторели єдинствене становиско же нє сцеме надрильовац свойо ришеня, анї приставац на тоти хтори ше приноши без нас, алє жадаме вєдно з державу участвовац у приношеню Акцийного плану хтори будзе одвитовац шицким – гварел заменїк предсидателя Националного совиту Руснацох Йовґен Мудри.
Тиж так, як Мудри гварел и за Трецу програму радия РТВ на руским язику, на Координациї бешедоване и о заєднїцким наступу пре одредзени прициски политичних партийох на национални совити, же би ше их прекомпоновало. Заключене же ше видзе зоз заєднїцким сообщеньом и о тим будзе отримана конференция за новинарох.