БЕОҐРАД – У рамикох Манифестациї Днї рускей култури у Етноґрафским музею у Беоґрадзе вчера, 23. авґуста, представена Моноґрафия „Танци бачванско-сримских Руснацох”, а аматере приказали свадзебни обичаї, танци и писнї.
У уводним слове Серґей Тамаш гварел же тот капитални проєкт бул порядна активносц Завода за културу войводянских Руснацох, финансийно потримани од Покраїнского секретарияту за културу и явне информованє АП Войводини, хторого потримали и коло 30 сотруднїки Завода.
О Моноґрафиї бешедовали хореоґрафе Йоаким Рац и Микола Ґубаш. Рац визначел же було чежко написац тоту кнїжку, за хтору стоя децениї роботи на терену. По догварки руководства и стратеґийно, секциї у Руским Керестуре презентую и пестую баржей уметнїцки фолклор, а у Коцуре жридлови фолклор и обичаї. Ґубаш акцентовал же то капиталне дїло, а до його зявеня, танци нє були записани. Як гварел, Йоаким Рац описал крочаї, а вон, Ґубаш, комплетни образци танцох.
У програми, зоз хтору числена публика була барз задовольна, свадзебни обичаї Руснацох приказали члени КУД „Жатва” зоз Коцура, зоз Вербасу наступела мишана ґрупа шпивачох, члени КПД „Карпати” и музично-фолклорни ансамбл Дома култури Руски Керестур.
После програми присутни послужени зоз традицийнима рускима колачами и орґанизовани пригодни коктел и друженє.