РУСКИ КЕРЕСТУР – Того викенду, 15. и 16. авґуста, у Руским Керестуре будзе штварта туристично-привреднo-културнa манифестация Днї керестуркей паприґи, у орґанизациї Здруженя паприґарох „Капсикум анум”, Конїцкого клубу „Русин”, Здруженя женох „Байка” и Здруженя ремеселнїкох и приватних поднїмательох, а з потримовку велїх месних здруженьох, орґанизацийох, установох и поєдинцох. Днї керестурскей паприґи финансийно потримую Покраїнски секретарият за польопривреду, водопривреду и лєсарство, Општина Кула и Месна заєднїца Руски Керестур, а манифестация на соботу и нєдзелю будзе у центре Керестура и на Гиподроме „Леї”.
И тогорочни Днї керестурскей паприґи почню зоз стретнуцом паприґарох з одкупйовачами паприґи – на соботу, 15. авґуста на 12 г. у Мензи, та одходом на поля под паприґу, а потим фаховци з Польопривредней фаховей служби Вербас паприґаром отримаю преподаванє о охрани паприґи од хоротох, тиж у Мензи.
Понеже интересованє за тот „валалски бренд” вше векше, орґанизаторе обчекую же на Днї керестурскей паприґи приду коло трицец представителє рижних фирмох-одкупйовачох, як и медзи 15-20 представителє рижних фармацеутско-хемийних, та осиґуруюци хижох и банкох, з хторима паприґаре уж длужей сотрудзую.
У центре Керестура и по улїцох на соботу на 16,30 г. будзе дефиле коньох, а манифестация шветочне будзе отворена на 17 годзин у центре валалу, дзе предвидзена пригодна културно-уметнїцка програма, маскенбал дзецох, вистава паприґи, желєняви, овоци, виробкох ручних и ремеселских роботох и других продуктох. Орґанизаторе наградза найчежшу паприґу, найкрасши штанд, як и найкрасши дзецински маски.
Єдна з атракцийох манифестациї и варенє єдлох у котлох, а того року у коло 15 котлох буду варени полнєта паприґа, капуста, пасуля, вецей файти паприґашох – швиньски, рибов и баранї. Ґу тому, нащивительом буду понукнути и на рожню печена прашецина и баранчецина. Єдла по популарних ценох буду понукани од 14 до 20 годзин, а єсц ше будзе у Мензи.
У центре Керестура будзе простор за ошвиженє, а розвага зоз живу музику почнє уж на пияток вечар, после пририхтованя простору за манифестацию, цо будзе предлужене и на соботу, кеди нащивительох буду забавяц вецей домашнї и оркестри зоз страни.
Керестур на манифестацию обчекує и госцох зоз иножемства, понеже поволани делеґациї Свиднїку и Медзилаборцох зоз Словацкей.
Други дзень манифестациї, на нєдзелю, 16. авґуста, Днї керестуртскей паприґи буду на Гиподроме „Леї”, дзе предвидзени штири обегованя єднопрагацих коньох дринґачох и дефиле фиякерох. Змаганя почню на 15 годзин, а и ту нащивительом будзе понукнути паприґаш з вецей котлох, будзе орґанизована вистава продуктох ручних роботох, як и розвага зоз живу музику.
