КОЦУР – Мото-клуб „Пеґасус” з Коцура вчера и нєшка преславює свой дзевяти родзени дзень и з тей нагоди орґанизує мото-стретнуце з рок-музику. Мото- стретнуце ше отримує у просторийох ФК „Искра” и коло стадиону, а уход шлєбодни.
„Пеґасус” того року родзени дзень преславює дакус скромнєйше, понеже пенєж найвецей укладали до свойого нового будинку, а финансийну потримовку од спонзорох того року нє достали. Медзитим, як за Рутенпрес виявел предсидатель Клубу Дюла Байор, и попри тим друженє будзе веселе, понеже их нащивя госци зоз жеми и иножемства, а будзе ше слухац и добру рок-музику.
Госци з Македониї, Босни и Герцеґовини, Словениї, Горватскей, Мадярскей и Австриї, та и зоз Сербиї и з сушедних местох до Клубу почали сциговац вчера и велї ту буду ноцовац у своїх шатрох. Домашнї обчекую же тих дньох коло Клубу буду нашоровани коло пейцсто моторки.
Вчера на Мото-стретнуцу наступали рок-состав з Вербасу „Мултиґенерация” и коцурски „Демиґод”, а нєшка граю „Вайтснейк трибют бенд”, „Андерхамер” и „Ґодфадерс”.
