БЕОҐРАД – З буджету Републики Сербиї за национални совити националних меншинох прешлого року видвоєни 240, а у тим року опредзелєни 245 милиони динари, за 20 реґистровани национални совити у Сербиї и Єврейску општину, хтора у статусу националного совиту – гварене на вчерайшим округлим столє о финансованю роботи националних совитох, з надпомнуцом же и попри тим же средства звекшани – звекшане и число националних совитох.
Округли стол у Беоґрадзе орґанизовал Беоґрадски центер за людски права и Урбан ин у Хижи людских правох и демократиї, як пияту зоз шейсц планованих розправох пре запровадзованє конструктивного диялоґу медзи националнима совитами (НС) и державнима орґанами и орґанизациями цивилного дружтва, о улоги и значносци совитох у витворйованю правох меншинох у обласцох над хторима маю компетенциї.
Попри представительох НС, а спред НС Руснацох на сходзе бул заменїк предсидателя Совиту Йовґен Мудри, та представительох цивилного дружтва, на сходзе присуствовали и представителє Канцелариї за людски и меншински права Влади РС, котри бешедовали о моделу финансованя совитох з державного буджету. Вон исти як и дотераз – 30 одсто опредзелєних буджетских средствох доставаю шицки совити, 35 одсто на основи числа припаднїкох єдней националней меншини, а 35 одсто на основи розвитосци, односно дїялносцох єдней меншини, насампредз у обласцох над хторима маю компетенциї.
Як Рутенпрес дознава од Мудрия, окреме бешедоване о нєдоповедзеносци Уредби Влади РС, як подзаконского акту Закона о националних совитох, з хтору одредзена обовязка локалних самоуправох дзе язик даєдней меншини службени, же би финансовали єй национални совит. Прето ю локални самоуправи векшином нє почитую, за цо су нєсанкционовани, а и кед ю почитую – законски нє реґуловани модел и сума хтору у своїх буджетох маю опредзельовац за тоту намену.
Винєшене же спомедзи 51-ей локалней самоуправи у Сербиї дзе язик даєдней меншини службени, тоту законску обовязку сполнюю лєм 16. Медзи нїма и штири з пейц општинох, односно городу, дзе службени и руски язик – кулска, жабельска и шидска општина и Город Нови Сад, док тоту обовязку за тераз у своїм буджету нє предвидзує Општина Вербас.
Попри нєдостатку спомнутого моделу, представителє цивилного дружтва наглашели же финансованє националних совитох на локалним уровню завиши и од политичней структуру, односно политичней дзеки за опредзельованє буджетских средствох совитом. Пре пременку того стану, будзе основана окремна державна комисия, хтора би мала предложиц обовязуюце законске ришенє за финансованє националних совитох меншинох на локалним уровню.
На вчерайшим округлим столє поведзене же национални совиту реґистровани у Войводини финансийно у лєпшим положеню, бо попри доставаня средствох з републичного, доставаю их и з покраїнского буджету – за дїялносц и за розвой дїялносци совитох. Прето остатнї час, окреме после остатнїх виберанкох, вше вецей НС за свойо шедзиска вибрали даєдни места у Войводини.