НОВИ САД – У Сербиї и Войводини жени ище вше економски зависни и часто су на нїзших положеньох од хлопох, констатоване вчера у Покраїнскей влади на означованю Дня женского поднїмательства, дзе винєшени податки же у Войводини лєм коло 25 одсто жени поднїмательки, коло 17 одсто власнїци польопривредного ґаздовства, а 5 одсто предсидательки општинох.
О положеню женох бешедовали покраїнски секретар за привреду, обезпечованє роботи и ровноправносц полох Мирослав Васин, предсидатель Униї роботодавательох Войводини Станко Крстин и амбасадорка Дня женского поднїмательства у Сербиї Ксения Влаович.
Васин визначел же Покраїнска влада роби на змоцньованю положеня женох, та того року з ресорного секретарияту видвоєни коло 11 милиони динари за орґанизованє и запровадзованє обукох за поднїмательки у городох и руралних штредкох.
Амбасадорка Ксения Влаович гварела же Дзень женского поднїмательства – 14. новембер – ґлобални рух хтори промовує женске поднїмательство, а перши раз є означени 2014. року.