БЕОҐРАД – З нагоди Медзинародного дня женох з руралних подручох тих дньох отримани велї змисти хтори афирмую жени з валалох, а вчера, кеди ше тот дзень урядово означує, Поверенїца за защиту ровноправносци Бранкица Янкович оценєла же валалски жени маю значну улогу, алє су нєдостаточно припознати.
Вона гварела же жени з руралних штредкох часто представяю нєвидлїву роботну моц, часто су дискриминовани и економски нєсамостойни.
– Унапредзенє квалитету живота женох у руралних штредкох, зменшанє худобства, ровноправнєйше розподзельованє приходох и економских можлївосцох, та їх справедлївше дружтвене положенє – то барз значни аспекти отримуюцого розвою валалских штредкох у Сербиї – заключела Поверенїца.