НОВИ САД – Вчера, 15 марца, у 73. року живота, у Новим Садзе нєсподзивано умарла Ирина Ира Натюк, народзена Ковач, длугорочна лекторка и прекладателька за руски язик.
Народзена є у Бикичу 9. априла 1948. року, а животна драга єй родичох приведла ю до Нового Саду, дзе закончела Филозофски факултет. У младосци була активна шпивачка, участвовала на велїх културних манифестацийох, а ма и векше число знїмкох руских шпиванкох у фонотеки Радио Нового Саду. Робела як професорка руского язика у керестурскей Основней и штреднєй школи „Петро Кузмяк”, як и на лекторских и прекладательних роботох у „Руским слове”, Рускей редакциї Радио Нового Саду и Прекладательней служби Секретарияту за образованє, предписаня, управу и национални меншини/национални заєднїци, одкаль пошла до заслуженей пензиї.
За Ирину Натюк остали велї з окремну точносцу, прецизносцу и пожертвовносцу преложени и вилекторовани тексти як литературного, так и административного змисту.
Ирина Натюк була член Дружтва за руски язик од самого його снованя и вредни член Секциї лекторох и прекладательох, дзе дала конструктивне доприношенє розришованю нових терминох и виразох на наш язик.
Ирина Натюк будзе похована на Городским теметове у Новим Садзе на соботу, 20. марца на 11,15 годзин.