Мр Сенка Бенчик, дзивоцке Папуґа, народзена 28. децембра 1973. року у Бачкей Тополї, дзе закончела и основну школи. Штреднє образованє педаґоґийного напряму закончела у Образовним центре „Петро Кузмяк” у Руским Керестуре (1992.), Педаґоґийну академию у Суботици (1998.), a Учительски факултет у Зомборе (2002.). Два мастерски роботи на Филозофским факултету у Новим Садзе одбранєла 2012. и 2017. року.
На виучованю руского язика як виборного предмету зоз елементами националней култури зоз новоораховскима школярами, з потримовку Дружтва за руски язик, литературу и културу, почала робиц ище як студент-абсолвент Педаґоґийней академиї 1993. року у Основней школи „Чаки Лайош” у Бачкей Тополї и „18. октобер“ у Новим Орахове. Зоз новоораховскима школярами участвовала на медзиокружним и републичним змаганю зоз руского язика и на нїх єй школяре зазначовали значни резултати. Школяре зоз наставнїцу Сенку участвовали на стретнуцох руских школох, а були и домашнї трох ювилейних стретнуцох: 5 (1998) 15 (2009) и (25) 2019 у Бачкей Тополї и Новим Орахове.
Мр Сенка Бенчик була порядни учашнїк семинарох з руского язика и член Активу наставнїкох руского язика. Потримала и орґанизовала семинар о басни як литературним жанру у руским язику у Новим Орахове 2006. року. Тиж потримала и отримованє штирох округлих столох зоз прешлосци Руснацох у Новим Орахове (2003-2006). Резултат тих сходох було виходзенє двох кнїжкох о Руснацох у Новим Орахове хтори видало Дружтво за руски язик, литературу и културу, Нови Сад.
Сенка ушорйовала и водзела радио-емисию на руским язику на Радио реґиї од початку єй основаня. То регионални радио општинох Бачка Тополя и Мали Идьош. Попри радио емисиї од децембра 2012. року на локалней бачкотопольскей телевизиї ушорйовала и водзела информативну тв емисию на руски язику. Була и дописователь РТВ -Рускей редакциї Радио Нового Саду.
Була предсидатель Секциї Дружтва за руски язик, литературу и културу у Новим Орахове у рамикох хторей роби Литературна секция „Штефан Чакан”, була активни член КУД „Петро Кузмяк” у Новим Орахове. Добитнїк є припознаня-плакети зоз меном проф. Гаврила Г. Надя за 2006. рок, Општини Бачка Тополя (2020) итд…
Мр Сенка Бенчик окончовала и длужносц директора Основней школи „18 октобер”, тиж у Новим Орахове од 2006. року у хторей ше настава отримує по мадярски. Настава по мадярски, пестованє руского язика зоз дзецми, мишани штредок яки новоораховски у хторим жию Серби, Мадяре и Руснаци дало порив же би Сенка зоз вельким интересованьом и дзеку приступела ґу виглєдованьом гунґаризмох у руским язику и же би на Филозофским факултета у Новим Садзе одбранєла два мастер робору под назву: Гунґаризми у руским язику и Заєднїцки гунґаризми у сербским и руским язику.
Автор є двох кнїжкох „Гунґаризми у руским язику“ (2014) и „Лексични паралелизми“ (2020) хтори видало Дружтво за руски язик, литературу и културу.
Сенка Бенчик будзе похована наютре, 19. юния, на 11 годзин на Заходним теметове у Бачкей Тополї.
Вична єй памят!