ПЕТРОВЦИ (РЕПУБЛИКА ГОРВАТСКА) – Длугорочни сотруднїк НВУ „Руске слово” зоз Петровцох у Републики Горватскей Желько Гаргай умар вчера у своїм 59. року живота.
После основней школи, закончел и штредню тарґовецку школу у Вуковаре, єден час робел, алє пре хороту, пошол до скорейчасовей пензиї. Як пошлїдок хороти, чежко ше рушал и бул вязани за дом и свой любени валал.
Желько Гаргай роками предавал кнїжки котри видала наша Установа и трудзел ше же би у найчежших часох Руснаци споза Дунаю доставали кнїжки на руским язику. Запаметаме го як чесного и добронамирного сотруднїка котри свой шлєбодни час нєсебично давал свойому народу.
Желько будзе поховани нєшка на 14 годзин на Грекокатолїцким теметове у Петровцох.