НОВИ САД – Новинаре, редакторе и директоре руских новинох „Руске слово”, мадярских „Мадяр Со”, словацких „Глас люду” и горватских „Хрватска риєч” вчера и нєшка участвую на другей часци Академиї за менаджмент медийох „MC Academy 2015”.
На основи конкретних случайох других европских новинох на язикох меншинох, представителє наших медийох пробую ришиц проблеми хтори препознали як найзначнєйши. Понеже новини на язикох националних меншинох маю мисию информовац, а у истей мири и очувац язик, вони нє комерциялизовани, та су з тим и нє самоотримуюци. З Академию за менаджмент ше пробує звекшац функционалносц редакцийох и унапредзиц положенє меншинских медийох на тарґовищу.
На Академиї преподаваю фаховци з обласцох медийох, комуникацийох, маркетинґу и менаджменту з европских державох, а едукацию водзи Юрий Дякомели, власнїк медийней хижи „Дякомели медиа” („Giacomelli media”) з Любляни. О историї дньових новинох на словенским язику у Италиї „Приморски дневник” присутним бешедовал бувши новинар и редактор тих новинох Боян Брезиґар, котри наглашел же за квалитетне информованє ключна черанка информацийох и добри контакти, та препоручел присутним же би медзисобно сотрудзовали.
Часц преподаваня була пошвецена диґиталней стратеґиї и способом анализи „диґиталней публики”, о чим бешедовал Марио Кривокапич з новосадскей старт-ап фирми „Content insights”.
Вецей о тих темох представителє медийох буду слухац и нєшка, а на концу учашнїком буду додзелєни сертификати.
Покровителє Академиї Министерство култури и информованя Републики Сербиї и Покраїнски секретарият за културу и явне информованє.