НОВИ САД – Вчера у Новим Садзе 41 младей малженскей пари уручени контракти о купованю хижох на валалє, за хтори Покраїнска влада видвоєла вєдно 40 милиони динари, а пре оживйованє валалских штредкох и помоц младим.
– Видзели зме яки алармантни стан кед сцигли резултати остатнього попису жительства. Видзели зме же ше Сербия и наша Войводина зменшую и валали вимераю. Жадаме же би ше нашо валали, у хторих хижи празни, знова пополнєли, жадаме злєпшац положенє женох, понеже ше у нашим дружтве 90 одсто маєтку водзи на хлопох. У тих хижох буду жиц 93-ойо дзеци и думам же то найкрасши податок хтори зме нєшка чули – гварел покраїнски премиєр Боян Пайтич на подпиосваню контрактох.
Директорка Заводу за ровноправносц полох Весна Шиячки тиж визначела же з тим конкурсом витворени важни циль з родней политики, а то ровноправна заступеносц парох на конкурсу.
На конкурс ше приявели вєдно коло 350 фамелиї, цо указує же нє правда же нїхто нє жада жиц на валалє, же постої перспектива за розвой войводянских валалох, хтори нє треба же би вимерали – поручели представителє Покраїнскей влади и гварели же плановане розписац ище таки проєкти, та поволали млади пари же би ше на нїх приявели.
