КОЦУР – У Доме култури у Коцуре вчера отримани Крачунски концерт хтори вєдно пририхтали вецей коцурски здруженя. Концерт отримани после вечаршей Служби Божей и мированя, пред полну салу з публику.
На концерту наступели Хор Успения Пресвятей Богородици, под дириґентску палїчку Єлени Алексич, з двома колядами; Дзецинска фолклорна ґрупа КУД „Жатва” з музично-драмску точку „Бетлегем”, хтору пририхтал Микола Ґубаш, а потим два шпивачки одшпивали мадярску коляду, хтору з нїма пририхтала Ґабриєла Зупко.
Наймладши члени КУД „Завичайно врело”, котрих пририхтала Миряна Бокан, представели православни крачунски обичаї, а потим з нашима колядами наступели шпиваче з прешлорочней манифестациї „Шпиваночки”, котрих пририхтала Танита Ходак, як и Руска женска шпивацка ґрупа КУД „Жатва”.
На концу виронаучна ґрупа дзецох приказала интересантну крачунску програму, а пририхтали их Ксения Бесерминї и ч.ш. Михаїла Воротняк.
После Концерту за шицких учашнїкох орґанизоване друженє и пригодни коктел.
