РУСКИ КЕРЕСТУР – У Водици вчера, на Треци дзень Русадльох означени традицийни Завитни дзень, а Архиєрейску Службу Божу предводзел наш владика Георгий Джуджар.
З владиком сослужели осем священїки з наших парохийох, на чолє з домашнїм парохом о. Михайлом Малацком, а троме споведали. Попри вирних з Керестура, на Завитни дзень пришли и вирни з вецей парохийох.
Орґанизовано, на менших автобусох були Дюрдьовчанє, Новосадянє, на приватних автох пришли Коцурци, Кулянци, Вербащанє, та зоз Шиду, одкаль були и священїки, як и парохове з Беркасова и Бачинцох. Було и поєдинцох з Петровцох, з Горватскей.
Апостол и Євангелию читали Новосадянє – дзияк Йовґен Надь и парох о. Юлиян Рац, а владика наказовал о помоци Мацери Божей, хтору нам вецей як 150 роки дава и у нашей Водици.
Традицийни обход коло церкви на концу Служби нє бул пре вельки диждж.
Домашня парохия за керестурских парохиянох и того року обезпечела автобус за превоз на Завитни дзень, а по законченю, у просторийох Каритасу за паломнїкох з других парохийох пририхтане ошвиженє и закуска.
Службу Божу з нагоди Завитного дня у Водици директно преношела и новосадска редакция „Радио Мариї”.
