РУСКИ КЕРЕСТУР – У Предшколскей установи „Бамби” у Руским Керестуре вчера предшколским дзецом Емил Няради спред Руского народного театру „Петро Ризнич Дядя” виприповедал першу з омнибуса сказкох за дзеци „Вандровкаш”.
Дзеци зоз предшколских ґрупох вихователькох Емилиї Костич и Ксениї Вучкович з увагу и реакцию провадзели Вандровкашову приповедку, а Емил Няради и на тот завод указал свою притоку ґу успишней комуникациї з наймладшима.
Авторка першей сказки „Рибар и принцеза” у проєкту „Вандровкаш” Ирина Гарди Ковачевич, а адаптацию и режию поробел Владимир Надь Ачим.
Тото виводзенє источашнє зняла Руска редакция РТВ цо по словох директора РНТ „Петро Ризнич Дядя” и одвичательного редактора Славка Ороса, будзе и свойофайтови дарунок РНТ наймладшим за наиходзаци швета.
Тот наступ би требал буц початок вецейрочного проєкту з хторим РНТ ма намиру афирмовац творчосц за дзеци на руским язику през проєкт „Вандровкаш”, приблїжиц руски язик наймладшим ґенерацийом и з нїм кед годно, нащивиц цо вецей нашо места.
